Carta da di respargn
Samedan resta mobil: Carta da di respargn Vschinauncha in nouv format a partir dal 2024
La VFF ho actualiso sia spüerta da cartas da di respargn e spordscha ün nouv model a partir dal 2024. Samedan fo part facultativmaing, uschè cha tuottas abitantas ed abitants samedrins scu eir tuottas possessuras e possessuors da seguondas abitaziuns paun profiter. La cumpra e’l predsch da quista nouva carta da di as müdan però.
Important: La nouva carta po per intaunt be gnir retratta al fnestrigl da l’Administraziun cumünela Samedan e que in fuorma d’ün e-ticket pesunaliso i'l format PDF, stampo u scu ticket sül telefonin.
La nouva carta da di da la vschinauncha vain spüerta per la 1. e la 2. classa scu eir cun u sainza abunamaint da mezza taxa. A paun eir gnir pustos püs bigliets la vouta. Mincha carta es però persunaliseda cun prenom, cunom e data da naschentscha.
Sülla pagina web cumünela nu’s vezza pü la disponibilited, il contingent da las cartas. Uossa as stu consulter üna pagina web centrela, www.spartageskarte-gemeinde.ch, per gnir a savair dapü e que infin ses mais ouravaunt. Quauntas cartas chi staun lura a disposiziun quel di giavüscho, dependa da la quantited da persunas chi vöglian ir in viedi in tuot il pajais. A do nempe be pü ün pot da bigliets per tuot la Svizra.
Eir ils predschs as po gnir a savair sün quista pagina centrela, www.spartageskarte-gemeinde.ch. Ils predschs varieschan nempe: Pü bod cha’ls passagers reservan lur bigliets e pü favuraivels ch’els sun. Ils predschs ils pü bass vegnan spüerts fin maximel 10 dis aunz la partenza dal viedi.
La Vschinauncha da Samedan giavüscha a tuot ils passagers e passageras ün bun viedi favuraivel!