Direkt zum Inhalt springen

Suchformular

Scoulas professiunelas

Scoula professiunela industriela

Tal center da furmaziun Samedan tuocha eir la scoula professiunela industriela. Cun var 300 giarsun(a)s è’la la seguond granda scoula industriela dal chantun. Respunsabels per l’instrucziun in trais linguas (tudas-ch, rumauntsch, taliaun) sun 16 magisters in plazza plaina e 18 in plazza secundaria. La chesa da giarsuns e la mensa spordschan eir a giuvens d’utrò cundiziuns d’abiter e da manger favuraivlas.

La spüerta da plazzas da giarsunedi in Engiadina es multifaria. In bod tuot ils misters industriels as po fer ün giarsunedi. L’ufficina per giarsuns falegnams e quella pels informatikers cumpletteschan la spüerta. La granda part dals giarsuns po frequenter a Samedan l’instrucziun regulera da scoula professiunela, per part eir ils cuors d’introducziun. A vegnan spüerts differents cuors da scolaziun supplementera. Impü es que pussibel da fer la maturited professiunela tecnica.

 


Scoula professiunela commerciela

Dal 1921 es gnida fundeda la scoula commerciela da l’Engiadin’Ota. Fin l’an 1980 vaiva lö l’instrucziun illa chesa da scoula cumünela a San Murezzan, daspö lo a Samedan, illa chesa nouva da las scoulas professiunelas. Hozindi frequaintan var 200 giarsun(a)s in 12 classas l’instrucziun da 7 magisters in plazza plaina e da 5 magisters in plazza secundaria. Ils seguaints misters tuochan tar la spüerta da scolaziun: impiego da commerzi, impiego da büro, impiego da vendita e da commerzi in detagl. Impü es que pussibel da fer la maturited professiunela commerciela. Var 400 creschieus faun adöver da la vasta spüerta da cuors da perfecziunamaint düraunt la saira (linguas, informatica, cuors generels). Purtedra es aunch’adüna la Societed da commerzi d’Engiadin’Ota. Ün cussagl da scoula maina la scoula, ün rectur es respunsabel per la gestiun.

Ulteriuras infurmaziuns:

Gewerbeschule Samedan

Las scoulas professiunelas da Samedan pussibilteschan als giuvenils indigens üna scolaziun in vicinanza da lur lö da lavur e da domicil ed impedeschan cotres lur emigraziun per motivs da furmaziun professiunela.