Situaziun geografica
Samedan es caracteriso tres sia pusiziun centrela in Engiadin’ota. La via, la viafier e l’aviatica garanteschan l’access. La vschinauncha es situeda a la cruscheda da las vias dal süd al nord e da l’ost al vest. Üna rait da vias efficiainta collia Samedan cul Grischun dal nord e’l Grischun centrel, cullas vals dal süd e cull’Italia poch dalöntsch davent. Ils grands spazis economics da Turich, Milaun e Minca (München) sun ragiundschibels cul auto infra 3 uras. Il trafic public (bus regiunel e Viafier retica) cun uraris cumpacts evra tuot la regiun ad abitants, a turists ed a persunas chi lavuran. Tuot l’infrastructura importanta es dimena ragiundschibla infra pochs minuts. Grazcha a l’unica plazza d’aviatica in Grischun es que pussibel da river a Samedan eir tres l’ajer.
| Plaun da la situaziun | Plaun d'access |
|---|---|
 |
 |