Direkt zum Inhalt springen

Suchformular

Furmaziun da creschieus

 

erwachsenenbildungszentrum

Center da perfecziunamaint

Que chi pera hoz actuel, po esser damaun già antiquo. Be tres ün perfecziunamaint planiso es que hozindi pussibel da ster a pêr ed a pass cul svilup rasant. Chi chi spenda raps per as perfecziuner, investescha i’l avegnir. In sieu center da perfecziunamaint spordscha l’Academia Engiadina üna bgerüra da cuors per creschieus. Persunas d’instrucziun qualifichedas da la scoula media e da la Scoula superiura da turissem dal Grischun scu eir experts externs pussibilteschan üna richa ed excellenta spüerta da cuors.

 

Ulteriuras infurmaziuns:
www.academia-engiadina.ch/weiterbildung.html


Scoula professiunela commerciela d’Engiadin‘Ota

Minch’an frequaintan tschients da creschieus interessos ils cuors da saira da la scoula professiunela commerciela d’Engiadin‘Ota a Samedan. La scoula professiunela commerciela cun sieu partenari per cuors da creschieus, l’Academia Engiadina, spordscha insomma la pü granda schelta da cuors da perfecziunamaint illa regiun.

Ils cuors da lingua e d’EDE (EDV) cumainzan adüna in schner e la fin d’avuost. L’instrucziun ho lö üna vouta l’eivna e vain spüerta sün differents livels da difficulted. Nus offrins eir cuors per firmas. Nossas spüertas varieschan tuot tenor la dumanda.

Daspö il 1996 offran la scoula professiunela industriela e la scoula professiunela commerciela ün cuors cumünaivel per ragiundscher la maturited professiunela tecnica u commerciela. Il cuors düra duos semesters e vain spüert zieva il giarsunedi scu cuors cumplementer a la professiun. El cumainza in avuost ed es aviert per absolventas ed absolvents d’üna scoula professiunela commerciela u industriela.

Ulteriuras infurmaziuns:
www.berufsschule-samedan.ch


Scoul‘ota populera d’Engiadin‘Ota

La Scoul’ota populera d’Engiadin’Ota (SOPEO) es gnida fundeda dal 1976 ed es commembra da l’Associaziun da las universiteds populeras svizras. Ella promouva il perfecziunamaint da creschieus e giuvenils cun üna spüerta vasta. La SOPEO as drizza a persunas laicas interessedas ed a specialist(a)s, ella s’impegna per las valuors tradiziunelas scu eir per temas actuels ed intermediescha savair pratic, idejas ed impuls in bgers champs da la vita.