Cordielmaing bainvgnieu!
Cheras Samedrinas, chers Samedrins, chers giasts
Sün quista website vains nus cumpilo infurmaziuns importantas davart nossa vschinauncha. Els chattan cò indicaziuns actuelas, nüzzaivlas ed interessantas in connex cun nossas autoriteds, instituziuns e societeds scu eir in connex cun nossa vasta spüerta culturela, turistica e da passatemp.
Per tuots – saja ch’els vivan u lavuran cò, saja ch’els giodan lur vacanzas – spordscha Samedan pussibilteds fich specielas ed attractivas. Da sted e d’inviern es Samedan il punct da partenza ideel per excursiuns illa grandiusa cuntredgia da l’Engiadina. Aderents dal sport e da gitas chattan traunter 1698 m e 4049 m s.m. (Piz Bernina) tuot que chi voul per passanter mumaints inschmanchabels. Samedan es però eir la chapitela e cun var 3000 abitants la seguond granda vschinauncha dal circul Engiadin’Ota. Scu center da trafic, cultura, furmaziun, sandet, commerzi ed industria giouva Samedan üna rolla importanta.
Tradiziun ed innovaziun as daun il maun tar nus a Samedan. Que voul dir, cha nus chürains la lingua e cultura rumauntscha ed il center istoric dal cumün cun sias bellas chesas engiadinaisas e cha nus lavurains a listess mumaint vi dal svilup da nossa vschinauncha.
Uschè es Samedan dvanto auncha pü attractiv i’ls ultims ans – per exaimpel cull’avertüra dal Bagn minerel & Spa, chi Als invida immez vschinauncha a fer il «bagn traunter tschêl e terra, baselgia e muntagnas». Già be l’architectura simpla ed extraordinaria, chi armonisescha bain culs edifizis cunfinants, renda üna visita inschmanchabla.
Per chi chi tschercha recreaziun illa natüra es eir la renaturalisaziun da l’En e dal Flaz ün grand guadagn. Grazcha a quist proget premio sun naschidas müravgliusas agnas e magnificas raits da sendas.
Nus ans allegrains da pudair glivrer e realiser i’ls prossems ans aunch’oters progets impromettants, scu per exaimpel imsüras per optimer il trafic (suotpassagi da la Viafier retica, chesa da parker) u il nouv center da sport e passatemp a Promulins, chi saro aviert tuot an.
Ed uossa Als giavüschainsa ün’excursiun früttaivla sün nossa website. Ch’Els ans contacteschan, sch’Els drouvan ulteriuras infurmaziuns u sch’Els haun giavüschs speciels! Nus Als güdains gugent persunelmaing.
Thomas Nievergelt
president cumünel
- nach oben |
- Seite drucken |
- > Aktualisiert am: 29.07.2010
